عفوا ... الموقع تم حجبه بواسطة الهيئة القومية للإتصالات

فجأة كدة تلقى الشاشة بقت سودا قدامك و بديك علامة دائرة عليها خط مائل بالأحمر "علامة ممنوع"
و تلقى الرسالة : عفوا الموقع تم حجبه بواسطة الهيئة القومية للإتصالات
" كاتبين لينا عفوا ليه؟ ما كنتو تكتبو لينا ممنوع الدخول يا حيوانات!!!
المهم الرسالة دي مفروض تلقاها في المواقع الإباحية و أي حاجة مخالفة للشرع و نحن بنقول ليهم مشكورين وجزاكم الله خير

لكن ما معقول كل ما ادخل موقع مشاركات فيديوهات القا الصفحة دي

موقع قوقل فيديو محجوب و في موقع مشاركة فيديو مخصص للموبايل برضو محجوب
بالعربي كدة ناس الهيئة القومية للإتصالات إتجاهم واحد و قايلين الناس كلهم زيهم اتجاهم واحد .. بالعربي كدة أي زول بدخل موقع فيديوهات بكون داخل عشان يشاهد فيديوهات جنسية .. بس المواقع دي زي ما فيها اباحية فيها قران و اناشيد و خطب و اخبار و رياضة و و و و و حاجات كتيرة مفيدة
لكن ناس الهيئة بكونو قالو السودانيين ديل اتجاهم واحد و مواقع الفيديوهات دي اثمها اكبر من نفعها .. لو شغالين بالمبدأ دة بكرة بقولو فيس بوك الناس بستخدمو غلط و بعاكسو الفتيات و بخربو بيوت و بعملو مشاكل و جرائم و بي كدة يدخل الفيس في حتة اثمه اكبر من نفعه و بالتالي يتحجب و هلما جرا

و شوية شوية يقفلو لينا معظم المواقع

السبب الخلاني أكتب الملاحظة دي انو في موقع اليكسا المخصص لترتيب المواقع لقيت انو من بين اكتر عشرة مواقع من حيث عدد المتصفحين في السودان . في المركز السادس لقيت الصفحة بتاعة الموقع تم حجبه ... يعني ناس الهيئة القومية للإتصالات خاربين سمعتنا و أي زول ح يشوف ترتيب المواقع في السودان ح يقول انو الشباب السوداني شباب بايظ

فوزى غفوا الصفحة محجوبة غالبا ما تحوى افلام اومواقع اباحية بغض النظرعن اسم اومسمى الموقع فالحجب ياتى اليا عن طريق كلمة وضعت فيه وهذا الكلمة مصنفة من قبل الهيئة بانها ممنوعة وعند مرور محركات البحث التابعة للهيئة عليها وتتعرف عليها اليا يتم تصنيف الموقع محجوب اى انه لاتوجد مراقبة مباشرة بل عن طريق برامج وضعت لهذا الغرض وهو لحماية المواطن والشباب بصورة خاصة وهو محمده وليس تشهير بنا كشعب وكما هو معروف عن الشباب فى فترة ما بعد الصبى اى المراهقة معروف عنه بحب الاستطلاع والدخول فى الممنوع خاصة فى عدم وجود الرقابة من قبل الاهل وانت تدرى ما هو النت ما ياتى به
وفى الختام ادعو الله ان يجنبنا الفتن ما ظهر منها وما بطن ويحمى شبابنا من كل سؤ ودمت بود

الأخ عزالدين
أنا أتحدث عن حجب مواقع بالكامل
و زي ما قلت الحجب مفروض يكون لصفحات معينة
يعني في مواقع مشاركة فيديو محجوبة بالكامل
مع إنه المواقع دي بكون فيها إسلاميات وحاجات مفيدة كتييييييرة مقارنة بالضارة
‏_‏
‏_‏
تحياتي

فوزي مصطفى احمد الفكي كتب:: الأخ عزالدين
أنا أتحدث عن حجب مواقع بالكامل
و زي ما قلت الحجب مفروض يكون لصفحات معينة
يعني في مواقع مشاركة فيديو محجوبة بالكامل
مع إنه المواقع دي بكون فيها إسلاميات وحاجات مفيدة كتييييييرة مقارنة بالضارة
‏_‏
‏_‏
تحياتي

وانا كذلك اخى فوزى
فالكلمة التى اقصدها قد تكون داخل احى المواضيع وبما انها وردت فى هذا الموقع فانه يشفر ويحجب بالكامل ولو لاحظت هناك سؤال يلتى ضمن صفحة الحجب وهو كا لاتى ( هل ترى ان هذه الصفحة يجب ان لا تحجب ؟)ويمكنك ان تراسل الشركة الحاجبة للصفحة وتوضح السبب الذى تراه مناسبا فى عدم حجب الصفحة ودمت بود

و دي واحدة من اكبر مشاكل البرمجيات يا أخ عزالدين
يعني الكلمة مشفرة يعني مشفرة
البرنامج ما بقدر يميز إن الكلمة ليها أكتر من معنى
وما بقدر يتصرف زي الإنسان لأنو مبرمج على حاجات معينة
‏"‏ مثلا في مايكروسوفت ورد في تصحيح الأخطاء الإملائية بعد تكتب اسمك بجيك خطأ لأنه اسمك ما مبرمج"
‏_‏
‏_‏
نرجع لي موضوعنا
المشكلة هي حجب المواقع بالكامل
وليس صفحات معينة
‏_‏
قريت إن في السعودية لو في موقع فيهو محتويات مخالفة
هيئة الإتصالات بتحجب الصفحة المخالفة بس
وباقي الموقع بكون شغال عادي
‏_‏
‏_‏
‏_‏
تحياتي